Amun Guna Bahaau Tah Ingat

Assalamualaikum wbt,

Ani kan bacaita jua diee pasal damam pilihanraya yang inda batah lagi. Bagi Naagi Saawak DUN inda bubaa, jadi pilihanraya tahun anie untuk Parlimen nganya. Naagi-naagi lain samuha DUN bubaa. Bagi Y.B-Y.B party pamaintah samada DUN atau Parlimen, salagi balum sampai aie panamaan calon, bilang oang kakal inda sanang tidoo. Inda olah sanang tidoo, sabab takut inda kana calon akan lagi. Bagi bakal-bakal calon Pambangkang, bisia inda ya ingau hantap, yang mbaie ingau nganya mangkali "usin". Pilihanraya anie amun inda baapa dalam pakit, payah kan manang. Pangundi kaang anie hantap pintaa-pintaa tia bisia. Amun pangaasnya inda cukup payahkan dapat undi bisia. Bilang buting tia usin uja dangan. Amun haap kan bakimpin dian aing lioo nganya, balum tantu dangan ngundi.

Paangai pangundi macam anie yang sabanaanya diajaa olih oang-oang politik yang dahulu. Amun daie mulanya inda ya diajaa macam atu, inda ya pangundi mbuat macam atu. Tapi paangai politik usin ani payah kan diusai amun indaa baapa luus gayanya. Oang kampung kaang anie hantap pandai tia bisia, bila inda ada kuita disadia akan ka tampat mangundi, inda bisia mahu ngundi. Amun inda ada usin gantian sabab sahaie inda ulah mahat, ka laut atau bakaaja batukang, bakaaja kontrik atau apa-apa saja kaaja inda jua bisia ajin hantap kan ngundi. Mau jua RM30.00 saoang kan dibaai oleh calon-calon Y.B. sama ada calon party pamaintah atau pambangkang. Amun RM30.00 saonag, banyak jamu kan di baai aah pangundi, amun inda baapa cukup katan, inda baik ayun tu jamu mulih ka umah. Kala-kala pangundi anie pun ada tia jua yang makan dua pinggan, aah party pamaintah pun ya makan, aah party pambangkang pun bisia makan, sabab bisia tahu musim pilihanraya anie tia banyak bisia luih usin.

Ejen-ejen calon pun bilang oang tia baik hati musim ani, bila minum di kadai kopi aie kan hampiee pilihanraya anie inda payah mbawa usin. Calon-calon Y.B. atau ejen-ejen bisia tatap ada di kadai kopi, nunggu kan mbaai akan dangan minum. Bakimpin tah bisia bah atu. Oang kampung amai tia yang iski amun musim pilihanraya. Bakal-bakal calon pun bilang oang tia baik hati, ngunjuk tangan inda bapilih tampat. Di kadai kopi, di pasaa, di tamu, di garai makan, kala-kala dalam jamban pun ngunjuk tangan, di surau dian masjid atu inda payah diista. Bila talihat oang kampung mulih daie kadai bajalan batis, bakal-bakal Y.B. tatap baanti kan nyuuh naik kuita bisia. Amun sudah luum-luum dikit, tunggul pun uja bisia jalama kan di tagoo akan. Sandi tu guna bisia undi.

Bila paangai bisia yang jadi Y.B. dian ejen-ejen bisia atu dapat ditaus akan sampai salapas pilihanraya, hantap baiknya. Tapi yang mbaie hijap bisia anie, paangai yang hantap baik atu inda ya batah. Lapas pilihanraya tuus taya, bila calon yang alah atu jangan tia dista, isoknya gaib taya bisia, batang hidungnya pun inda kalihatan lagi. Anie tah yang uja dangan "Amun Guna Bahaau Tah Ingat", amun bisia inda guna dibuat-buat kalupahan.

Paangai "Amun Guna Bahaau Tah Ingat" anie bukan nganya aie kan pilihanraya. Yang sabanaanya paangai anie bilang haie kita lihat, dalam kita baniaga, dalam parsatuan, dian paadian, dian kawan, dan macam-macam kaadaan lagi lah uja dangan. Anie kan bacaita jua diee pasal pangalaman yang banaa-banaa sudah diee asaie. Aie diee kakal bakuasa bianie, kawan-kawan anie inda payah dicahaie, batimbun-timbun yang datang kan minta projek itu dan projek ini. Kan bilang malam kaluaa makan malam kana bawa sabab malobi projek punya pasal uja dangan. Bila dapat, aie diee makan pun kan disuapi, diee bajabat tangan, tangan kana cium dan macam-macam lagi paangai jalama amun bisia kan gunakan diee. Mulih ka umah bakalahi dian bini sabab luan hantap ahiee mulih, paanak pun inda talihat. Aie diee mulih paanak sudah tidoo, isok sambat aiee diee batolak daie umah paanak kakal tidoo, kan bilang haie macam atu.

Tahun 2000 diee mula baniaga, satahun labih inda luih projek, gaji pakaaja kan dibaai bilang bulan, sewa opis, bil letrik, bil talipaun, bil aing, bil internet bilang bulan kan di baai. Atu hal baniaga, yang hal umah lagi, ansuran umah, ansuran kuita, bil-bil, balanjaa dapoo lagi samuha kan di baai. Usin masuk inda ada, usin kaluaa bilang bulan. Dua buah kuita diee kana taik, mbali minyak kuita pun RM5.00 nganya sahaie. Siksa, susah, payah. Bila diee susah, kawan-kawan, yang mulanya baik hantap kan diee atu bilang oang tia hilang. Gaib antah kamana. Ditalipaun pun inda njawab, jangan kan nolong, bajumpa pun bisia inda mahu. Kan haap paadian kan nolong, jauh sakali, bisia pun bukannya oang sanang.

Tapi bila kita yakin bahawa sabaa atu sapauh daipada iman dan apa yang diee lalui atu ujian daie Allah SWT, Insya Allah, patunjuk akan datang aah diee. Cuma jangan sakali-kali lupa kapada Allah SWT, walau susah dan payah macam mana pun, santiasa ingat pada Allah SWT. Allah SWT maha berkuasa. Dangan kuasa Allah SWT saorang kawan datang mambantu tanpa diundang. Samasa dia manghulur bantuan aah diee anie macam anie tutuannya. "Mat, hari ani hari kau, besok lusa hari aku". Menitis aing mata ndangaa tutuannaya macam atu. Mulai daie haie atu ajiki pun datang haie dami haie dan parniagaan pun bajalan lancaa uja dangan. Kan dijadi akan caita, ani samuha kuasa Allah SWT, kawan yang mambari bantuan satu masa dahulu musim aie diee susah dikhabarkan mangalami masaalah parniagaan, bukan nda ada projek tapi basalisih paham ahli lambaga pangarah. Saoang ahli lembaga pangarah mamfailkan "suit" di mahkamah untuk mambakukan akaun bank syarikat. Lingkup abis. Jadi diee pun bajumpa lah dian kawan atau untuk menghulur bantuan. Macam ani tutuannya "Mat kan saya sudah cakap dulu, itu hari hari kau, ini hari hari aku pula."

Pangajaan yang dapat daie pangalaman diee sandiee anie ialah jangan sakali-kali kita guna kan paadian atau kawan atu bamusim-musim uja dangan, aie kita guna kan bisia ingat kita, tapi amun sudah dapat apa yang kita gunaakan atu kita buat-buat kalupahan. Sagala apa yang kita miliki didunia anie macam paanak, pabinian, haata, umah basaa, kuita basaa, kasihatan, ajiki samuhanya dipinjam akan oleh Allah SWT. Barang yang dipinjam akan atu tatap akan dimulih akan aah yang umpunya.

Macam didalam kita barparsatuan pun macam atu. Presiden dian AJK yang inda tapilih lagi jaan tah maah hantap aah aah oang bahaau yang ngambil alih parsatuan atu, sampai diumum akan di dalam website, yang website anie inda ada kaitan dian parsatuan atu parsatuan ani. Nyakit akan hati nganya bah atu. Ani bahaau-bahaau anie talihat ku "posting" di dalam website yang sama kan minta tolong tia pulang daie parsatuan. Kan tabalik aah diee atu. Paangai  "Amun Guna Bahaau Tah Ingat" anie sapatutnya di buang taya. Inda ya manyanang akan, manyusah akan ada. Hunjaa kawan banyak-banyak, musuh jangan dicahaie. 

Bah atu tah nganya. Bila asa-asa nya ada yang baik, ambil tia jadi tauladan uja dangan, amun asanya inda baapa baik jadi akan sampadan taya.