Nostalgia Hari Raya Tahun 60an

Dialek : Kadayan Sabah

Amaran : Jangan sekali-kali bermain dengan meriam buluh. Ia amat merbahaya dan boleh menyebabkan kecederaan yang serius.

Kapada sahabat-sahabat dan kawan-kawan yang saangkatan dangan panulis, lahiee pada tahun 50an, mungkin masih ingat apa gayanya kita bahaiee aya musim atu. Banyak bijanya amun di banding dian Aie Aya kaang ani. Amun diista aah paanakan, inda bisia picaya, tapi atu tah kabanaannya yang mungkin inda dapat lagi di asaai oleh anak cucu kita dimasa akan datang.

Kampung tampat panulis lahiee jauh dipisok, uja dangan. Ahiee tahun 50an dan awal tahun 60an, balum ada jalan basaa, yang ada jalan kampung nganya. Lalu di pulau buah dian kabun gatah. Kadai yang hampiee pun 5 batu daie umah. Amun kan ka kadai bajalan batis nganya. Naik biskal jauh sakali, bapa inda bausin mbaliakan biskal.

Saingat-ingat ku, umuu ku 7 tahun mulai taku bapuasa. Bila inda bapuasa kana hacut oleh bapa. Tapi kala-kala nipu jua, mulih daie sikolah musim bulan puasa, bajalan batis, hangat hantap, tajumpa sungai...sungkai taus. Inda olah nih, hantap kaing lihee. Bila bapa inda tahu....salamat. Tapi amun ya tahu, kana hacut. Amun sudah ku basaa dikit, abis jua puasa ku sahaie.

Mulanya, puasa sabulan atu hantap batahnya nunggu, macam satahun kan ngabis akan. Nunggu Aie Aya tu hantap batahnya. Aie diee damit mulanya, puasa atu inda baapa ingin, sabab kaing lihee. Yang hantap diee ingin Aie Aya. Sabab apa? Sabab musim atu dapat main BADIL .

BADIL kita mulanya bukan ya badil bababat, badil Kina, tapi BADIL BULUH buatan sandiee. Saingat-ingat, daie ku pandai mbuat BADIL BULUH dan bamain BADIL bilangkali Aie Aya, inda parnah ada kamalangan! Sabab apa? Sabab langkah-langkah kasalamatan atu di ajaa oleh oang tuha-tuha. Mbuat BADIL BULUH anie bukannya sanang. Yang panting buluh atu. Buluh misti BULUH TUHA, jinis BULUH TABAL. Amun buluh nipis jangan tah, sakali latup, pacah, inda baguna.

BADIL BULUH handaklah disimpai dian tali yang tahan. Kami mulanya, kami pakai autan puladas dijadi akan penyimpai. Tujuan simpai atu ialah untuk manambah katahanan BULUH dan kalau ia pacah pun inda ya bataabangan. Amun sudah disimpai bahaau tah ia di pasang. Muha BADIL BULUH biasanya dituju akan ka kampung sabalah. Sabab apa? Sabab kan balawan BASAA LATUP.

Masang BADIL BULUH bukannya main ampai-ampai macam atu nganya. Muha BADIL BULUH atu diampai akan aah batu atau tanah tinggi, atau disidal dian kayu yang basaa. Lapas atu ia DISANGKANG, sakuang-kuangnya tiga sangkang, bagantung kapada panjang badil. Pasilangan sangkang handaklah disimpai/ikat dian tali yang tahan, biasanya autan puladas atau tali yang tahan macam tali timbaan atau tigis. Tigis jaang dipakai, sabab inda baapa kuat, tigis baik untuk pangikat kalupis dia wajit nganya.

Bila samua langkah-langkah kasalamatan yang diajaa oleh oang tuha-tuha dituut bahauu tah mula bamain. Biaksanya, sabalum kabait dimasuk akan, oang tuha-tuha paiksa dahulu simpai BADIL BULUH dian SANGKANG. Amun inda kuat, oang tuha-tuha suuh baiki, sampai ia puas hati.

Amun sudah kabait dimasuk akan bahauu tah diisiee aing dikit. Amun sudah kadangaan buidihnya bahaauu tah diCUCUL. Tatap basaa LATUPNYA. MANANGIL talinga. Tuli tagal.

Kami mulanya, tiga haie sabalum Aie Aya, babadil tah kami. Kampung lain pun sama, ia tah balawan bunyi badil. Batingkah-tingkah bunyi latup. Mulih-mulih oang tuha daie sambahyang tarawih, kana maahi, sabab TAKAJUT oang sambahyang di surau.


Bila kan dikanang-kanang hantap baanieenya kanak-kanak mulanya. Tiga haie tiga malam bajuut-juut main BADIL BULUH. Sampai tuli bah uja dangan talinga. Amun kana lagau pun inda tadangaa. Menangil. Batah-batah jadi matingal. Yang baik takanang diee, malam bacucul. Kampung kami mulanya inda ada elektrik, aing paip jauh sakali. Inda ada lampung yang bakalip-kalip macam kaang anie. Bacucul malam Aie Aya atu satu kamastian uja dangan. Miskin macam mana pun kau, kakal jua bacucul. Sabuting dian pun cukup asal bacucul.

Di kampung kami mulanya jaang bacucul mamakai lampung palita, sabab payahkan luih minyak gas (tanah). Kalau ada pun payah ngangkut daie kadai. Jadi, bilang buah umah bacucul makai dian nganya. Bila dian yang panjang dapat jua sampai dua jam, atu pun bila inda baangin kuat. Bila baangin tagalnya abis tia. Lapas atu dipasang dian bahaau.

Malam aya, bacucul, babadil buluh, oang tuha-tuha maabus kalupis dan mbungkus wajit sambil bagalap-galap, satu kanangan yang payah kan dilupa akan uja dangan. Haie atu tah yang paling ditunggu-tungu oleh samuha kanak-kanak dian oang patuhaan jua. Kaang ani di kampung Kedayan pun macam atu jua tapi banyak tia kalainannya. Badil BULUH inda lagi ada. Bacucul pun pakai lampung palita dan lampung bakalip-kalip, jaang yang bacucul mamakai dian.

Aie diee damit mulanya, oang tuha-tuha salajuu nakut-nakuti, uja bisia aie malam aya atu banyak “roh” paadian-paadian yang sudah maninggal datang kaumah. Bila kamu inda picaya, uja bisia, cuba kamu hamboo tapung di hadapan pintu umah. Isok sambat kamu lihat, ada tampak batisnya aah tapung atu. Yang kita kanak-kanak ani picaya hantap, kala-kala ada jua niat kan mahamboo tapung dihadapan pintu, tapi takut, mangkali ada tampak batis manusia.

Malam aya, oang tuha-tuha ahiee tidoo sabab sibuk mahuaa dadih kalupis, mbungkus, manjalin dian maabus kalupis. Macam atu jua ngacau wajit di kawah dian mambungkus wajit. Kalupis dian wajit adalah makanan tradisi oang Kedayan samada di Boonai, Saawak dian Sabah sampai kaanani. Katupat ada jua dibuat oleh oang tuha-tuha, tapi bukan katupat sateh, tapi katupat yang digalaa KATUPAT LAPAT. Lamang dian randang musim atu inda ada.

Lauk yang biaksa dimasak musim Aie Aya ialah kari hayam kampung dan yang istimiwa sakali KARI DAGING PAYAU. Daging payau inda ya dapat dibali di kadai, tapi samalam dua malam sabalum aya atu, ada yang ajin babuu ka imba mancahaie payau. Amun luih payau, alhamdulillah, dapat jua maasai daging. Macam diee dikampung mulanya, kan makan daging sapi payah kan dapat. Satu haaga mahal, indung kita inda tabali, kadua jaang-jaang dangan nyumbalih sapi atau kaabau. Bila ada oang kawin, bahaau tah maasai makan daging, atu pun inda salajuu.

Daie sagi makanan (kuih muih) selain wajit dia kalupis, ada jua oang kampung yang mbuat pinyaam, punjung, tapai, buah hulu. Macam kuih sapit atu ada jua, tapi makanan atu bukan makanan tradisi oang Kadayan. Atu makanan oang Boonai.
Aie diee damit mulanya pakaian aya yang bahaau jaang dapat. Uja dangan apa yang ada dipakai. Tahu sajalah kaadaan masa atu, bukan nya sanang. Paindungan pun susah, kami bapadiaan pun amai, jadi pakaian aya atu memang jaang dapat. Cuma yang ku ingat, bila kan aya atu, mama bawa ku bagunting ambut nganya. Satu lagi kopiah, amun kopiah diee to hantap sudah lamanya, caik sana caik sini, waananya pun sudah baaubah daie hitam jadi kakuning-kuningan (salajuu kana hujan), bahaau tah mama mbali akan kopiah yang bahaau. Aie diee damit mulanya, ka sikolah pun bakopiah, bila inda makai kopiah kana maahi oleh indung. Kopiah sabuting nganya, dipakai bilang haie, apa gayanya kan tahan kian. Atu pun kala-kala dapat jua sampai tiga tahun bahaau tia batukaa.

Kahidupan diee mulanya inda sanang, kala-kala amun diee malihat paanak kaang ani, tiap-tiap minggu mbali baju, saluaa macam-macam dibali, nangis dalam hati nganya diee oang tuha nie. Atu balum lagi mbali hanphone yang haaganya labih saibu inggit. Atu tah uja dangan, jaman baubah, kahidupan pun baaubah. Inda dapat kita banding akan jaman kita mulanya dian jaman paanak kaangani.

Diee mandi mulanya bukan ya mandi aing paip nih. Sambat-sambat lagi sabalum hayam tuun daie aban uja dangan, kasungai tah diee kan mandi. Amun kan dikanang, mandi disungai aie sambat tu hantap sajuknya! Sampai katulang bah asanya. Tapi dipaksa jua, inda olah nih kan sambahyang sunat aya di suuau.

Di kampung diee mulanya, suuau inda ada sambahyang Jumaat, sabab inda cukup jalama 40 oang. Tapi amun Aie Aya, panuh bah suuau, ada yang sambahyang di tanah lagi. Bilakan dipikee-pikee akan, sambahyang Aya tu sunat nganya, tapi sambahyang fardhu ditinggal akan. Hantap inda luus bunyinya jamu. Tapi inda olah, masa atu diee pun kakal damit, balum tahu apa-apa.

Amun sudah mulih sambahyang sunat Aya, patuhaan pun bacaita:

“Hantap amainya dangan sambahyang tu antaie, inda tabuat di dalam, sampai kaluaa dangan sambahyang”

Ada tia yang nyahut tu, “Aau amai tu, tahun lapas pun inda sampai macam ani.”

Jadi macam biaksalah oang patuhaan, sambil-sambil makan kalupis bacacah dian kari ayam atau kari payau, banyak tia caitanya. Minuman jaman atu inda ya ada macam kaangani, yang ada kopi dian teeie nganya. Tapi amun sudah tajumpa kalupis dian kari payau, eeh hantap baik asanya atu. Mbaie tais liuu.

Mulanya, umah tabuka ani inda ada, siapa-siapa yang kan badudun aie Aya, datang tah saja. Kalupis wajit tahan sampai 3 -4 haie, yang capat abis lauknya nganya. Tapi oang mulanya inda ya bakia hantap, apa yang ada dimakan, bila inda ada inda ulah jua.


Aie Aya di kampung diee mulanya, inda ya macam kaangani. Makanan dan minuman inda banyak jinis. Yang ada kalupis dian wajit nganya, bila nasib baik ada jua hubi baabus atau oti-oti kaing yang dibali daie kadai. Minuman pun inda banyak jinis. Salalunya kopi dian tiee nganya.

Aie jaman diee damit mulanya umah tabuka ani inda ada. Bila aie aya, siapa-siapa kan BADUDUN, siang kah atau malam datang tah saja. Andangnya macam atu adat oang kampung jaman atu.

Yang hantap sanang hati diee kanak-kanak jua nganya. Balusie kasana balusie kamaie. Amun kabaid kakal ada, inda ada lain yang kan dibuat, MASANG BADIL, mandi di sungai. Aie puasa inda olah mandi puas-puas, nyalam pun inda dapat, taajun-taajun pun inda olah, takut tamasuk aing ka talinga atau mulut. Batal puasa! Biaksanya sabalah malamaie, lapas masang BADIL BULUH kami bamai-amai mandi di sungai. Mandi di sungai ani bukan nya tagal-tagal. Dua tiga jaam bahaau tah puas. Sampai kacut “si awang damit”.

Kanak-kanak kampung mulanya, bilang oang pandai bananang, bila inda pandai bananang, PALOI tah jalama atu. Sabab apa? Sabab bilang buting kampung mulanya inda jauh daie sungai. Amun ada sungai misti pandai BANANANG. Bila inda pandai bananang inda olah BAGALAU uja dangan. Aiee damit mulanya bagalau anie hantap iski diee. Baumah sieeng sungai atu pun ada sababnya. Inda jauh ngangkut aieng. Mulanya bukan ada aing paip macam kaang ani. Dua baadih aing dipikul dian pikulan. Pikulan aing tu ada panyangkutannya aah nauh baadi. Bila inda pandai mikul, sampai ka umah kala-kala tinggal sapauh nganya aingnya, tumpah.

Tapi oang mulanya kia pandai jua, aing dalam baadi atu inda tumpah bila ditauhi DAUN-DAUN GATAH. Daun atu timbul di atas aing dalam baadi. Jadi amun bagaak pun aing inda tumpah sabab dihalang olih daun. Tapi amun abah aie mikul aing tu, tumpah tah atu aing nya, inda olah jua.

Mulih bagalau, siapa yang tahu aie damit mulanya, mimang lapaa. Atu tah masa yang baik asanya makan kalupis bacacah kari payau, minum kopi hangat. Hantap baik asanya tu tangahnya!

Malam aya partama tu kakal amai kanak-kanak yang bamain. Balusiee kasana balusie kamaie, main BADIL BULUH. Masa atu tah jua oang patuhaan masang LAMPONG GAS. Disababkan kawasan taang, kanak-kanak pun sanang balusie kasana kamaie. LAMPONG GAS ani pun banyak caita, tapi bukan aie ani, nanti kamudian. Cuma yang kan ku caitakan pasal kaadan kawasan umah taang. Patuhaan masang LAMPONG GAS bukannya bilang haie. Cuma haie-haie tattantu nganya LAMPONG GAS dipasang. Sabab apa? Sabab LAMPONG GAS kuat makan minyak gas. Bukan atu nganya, mintolnya pun kana ganti salajuu. Bila mintol bubus, lain tia upanya, maaknya pun inda usai.

Amun kan dikanang-kanang, aie diee damit mulanya sabab biaksa baluum, sakali LAMPONG GAS di pasang olih oang patuhaan, suasana pun baubah. Tapi lampong taang ani pun ada jua masaalahnya. KULINTUTU. Kulintutu atu ingin hantap mahuung LAMPONG GAS. Bukan KULINTUTU nganya, banyak tia yang lain mahaga macam kaawai, bilalang, biek-biek, banyak tia, inda lagi ku takanang.

Yang sabanaanya panatapan haibulan Aie Aya dijaman diee damit-damit mulanya (kakal jaman Baitis) inda ku baapa ingat. Yang diee tahu oang patuhaan bapadah esok atau lusa Aie Aya. Apabila sudah basaa dikit kia-kia umoo 8 – 10 tahun, bahaau tah diee tahu.

Yang sabanaanya oang patuhaan nunggu di kadai, kala-kala di masjid untuk pangumuman haibulan Aie Aya. Daie mana luah bisia tahu? Daie Adio Boonai. Amun Boonai aya, oang kampung kami pun aya. Oang kampung mulanya inda ada adio, haapkan adio dangan nganya. Tapi kia kami banasib baik jua, sabab umah yang seeing umah kami atu ada adio.

Ani kan bacaita jua dikit. Yang sabanaanya anak bini-bini oang umah yang diam seeing umah kami atu kawin dian oang Malayah. Caita ani dalam tahun awal 50an. Oang Malayah atu bakaaja di Jabatan Partanian mbuat kajian tantang buah-buahan di kampung kami. Jadi oang Malayah atu ada adio. Kakal ku ingat “aerial” adionya dipasang diluaa umah. Bajaikatan upaya wayarnya. Kakal ku ingat ada ya bapadah amun BAKILAT dian BATAMPAIK adio inda dapat dipasang. Jadi oang patuhaan salajuu tia badudun kaumah sabalah atu bilakan dangaa adio. Umah kami inda ada adio, indung inda bausin kan mabali. Jangankan adio, kala-kala kan mbali baas pun payah. Macam atu tah kahidupan aie diee damit mulanya. Inda sanang, bukan macam paanak kaang ani.

Babalik ka panatapan haibulan Aie Aya dijaman diee damit-damit mulanya. Inda sabaa asanya nunggu oang patuhaan mulih daie kadai kan tahu bila aie aya. Biaksanya, macam kaang ani jua, pangumuman haibulan aie aya atu inda ya aie isok, tapi lusa. Amun sudah tahu lusa kan aie aya, hantap sanang hati diee. Sabab apa? Sabab inda lagi payah puasa. Tahu saja tah aie diee damit mulanya inda tahu apa-apa. Yang dikanang yang sanang nganya, yang payah inda diee baapa ingin. Na’auzubillah!!!

Isoknya oang patuhaan mula tia sibuk, ada yang ka kadai, ada yang mahunjaa daun NYIIK kan bungkus kalupis dian wajit, mahunjaa kayu kan mbuat TUMANG, mbasuh kawah, mahunjaa kayu api biaksanya kayu KULIMPAPA kaing, mahunjaa TIGIS kan dibuat panjalin kalupis dian wajit. Ada jua oang kampung yang biaksa babuu, kaimba taya kan mahunjaa payau. Macam macam tia. Yang diee kanak-kanak ani inda pandai nolong oang patuhaan, pandai diee kan main BADIL BULUH nganya.

Kakal ku ingat mulanya, malam aya atu sibuk oang patuhaan nangkap hayam di aban, kala-kala atas pohon nangka dian pohon ambutan tia ada. Bila siang payah kan nangkap, sabab hayam liaa. Amun hayam atu sudah ditangkap, oang patuhaan ikat sabalum disumbalih. Aku mulanya oang patuhaan salajuu nyuuh nahani hayam aie kan disumbalih. Sayap dian batisnya ditahani kuat-kuat, takut talapas aie ngaat lihee nya. Kala-kala ada hayam yang lambat mati, sampat lagi ya taabang ka bumbung umah. Atu uja patuhaan ada sababnya. Tapi inda bisia bapadah aah diee sababnya. Kamu kakal damit, inda payah tahu!!!

NOSTALGIA MAJALIS KAAMAIAN DI KAMPUNG KADAYAN TAHUN 60an

Dialek : Kadayan Sabah

Nota : Saya telah dimaklumkan oleh orang yang tahu tentang ilmu kebatinan orang Kadayan bahawa sebahagian dari Ilmu kebatinan suku kaum ini adalah terpesong dari akidah kita sebagai umat Islam, terutama sekali yang menggunakan mentera. Mengikut kajian, ada juga terdapat ilmu kebatinan suku kaum Kadayan yang menggunakan ayat-ayat suci al-quran dan berlandaskan sepenuhnya kepada tatacara dan peradaban Islam, terutamanya dibidang perubatan tradisional. Saya yakin para pembaca budiman dapat menilai hakikat yang sebenarnya dan nukilan ini hanyalah untuk mengimbau sejarah Kadayan masa lampau sahaja. Jangan bimbang di kampung kami TIDAK ADA lagi perkara-perkara seperti yang disebut dalam nukilan ini. (Oang tuha-tuha yang disabut dalam caita ani pun inda ada lagi, bilang uang sudah meninggal).Ini cerita dulu kala. Sekadar untuk penglipur lara. Selamat membaca dan terima kasih.

Ani kan bacaita lagi pasal aie aya. Tapi kali ani pasal Aie Aya Haji. Saingat-ingatku mulanya di kampung kami jaang dangan ngucap Aie Aya Haji atu Aie Aya Korban. Patuhaan pun ngucap Aya Haji nganya.

Disabab akan kaadaan musim atu, ekonomi oang kampung pun inda baapa baik, jadi oang kampung yang nyumbalih sapi atau kambing untuk korban dian aqiqah jaang-jaang. Saingat-ingat ku, aie diee damit mulanya, inda ada oang kampung kami yang nyumbalih sapi dian kambing aie Aya Haji. Nyumbalih hayam ada, tapi atu inda dikia korban sabab batis hayam 2 nganya, lagi pun damit, inda cukup dibahagi akan tujuh bahagian saikong. Amun dibahagi tujuh ada yang dapat tungking nganya pakah. Masing bagalap.

Oang kampung yang naik haji ada, tapi inda baapa amai. Kakal ku ingat aie diee damit mulanya ada oang kampung kan naik haji laki bini, tapi paanaknya inda tuut. Dikampung andangnya jadi kabiaksaan bila ada oangkan naik haji, makan-makan doa salamat dahulu sabalum batolak daie kampong. Oang kampung yang olah naik haji ani kia yang bausin nganya, jadi olah tah bisia nyumbalih kaabau atau sapi, kala-kala payau bila ada dangan luih babuu. Makan-makan doa salamat atu mimang basaa-basaan, samuha oang kampung basaa damit dijamput.

Oang kampung mulanya, ada tia yang baloyar buruk, bila ada dangan manggil makan-makan biaksanya ucapannya macam anie “Ooo bongsu atau tangah atau tua…bapa nyuuh kaumah esok, samuha (bilangoang) disuuhnya kaumah, kan makan-makan doa salamat” Bila yang baloyar buruk atu ada tia yang njawab “Aau…abis kami saumah tu kasana, ucing pun tuut”. Bila yang njamput atu pandai dijawabnya, macam ani “Paloi banaa bongsu nie…ucing tu inda payah dibawa, bukan ya jalama…jalama nganya bapa suuh jamput…bah mulih taku…jangan inda datang”.

Aie makan-makan sama ada makan-makan tahun, dangan kawin atu makan-makan doa salamat, yang iski kanak-kanak jua nganya. Hantap ingat ku masa atu bahaau baumoo 6, 7 tahun pakah, aie oang kampung makan-makan doa salamat kan naik haji mulanya, diee kanak-kanak ani talusie sana talusie sini. Kala-kala ada tia yang bingkas kapala, talangga tihang, talangga tangga, talanggaa pohon ambutan atau biabas atau talangaa sandie dian kawan, jadi kaaja oang patuhaan jua. Tapi oang Kadayan pasal luka dian daah mimang pandai. Pandai bisiaa MANTAN. MANTAN luka ani bukan sanang, tapi aku aie damit mulanya talihat oang tuha-tuha MANTAN luka, taus baanti daah kaluaa. Sandi tu oang Kadayan.

Oang patuhaan sibuk bausah. Bausah ani bukan nya aie makan-makan atu nganya, tapi sakuang-kuangnya sahaie sabalum makan-makan oang patuhaan sibuk taya mahunja daun nyiik, tigis, kayu api, kayu tumang, mbasuh kawah, minjam balah pacah, macam-macam taya ada yang babuu mahunjaa payau, kijang dian palanduk. Biaksanya malam atu mahuaa dadih taya kan mbuat kalupis dian wajit. Oang pabinian biaksanya bausah di dapoo ngupas bawang, mahaap bawang, ngupas hubi gantang, ngukoo piasau, nyusun daun nyiik, nyusun tigis kan panjalin kalupis dian wajit, dan macam-macam tia. Oang palakian sibuk mbasuh kawah, mbuat tumang, maasa daging, mbuat pahuwaa dadih, mbuat taatak, macam macam tia.

Aie-makan-makan anie tah uja dangan paluang basaa oang pamudaan untuk mancahaie pasangan masing-masing. Biaksanya aie makan-makan macam ani nganya Si Lamit dian Si Lamat dapat malihat Si Lamah dian Si Limah (macam lagu Sdra Ibrahim Hj Diman). Di kampung kami mulanya inda bibas, oang pamudaan (laki-laki dian bini-bini) jaang bajumpa, tahu-tahu tadangaa habaa ada tia yang batunang atau kawin. Inda diee tahu bila bisia bacinta uja dangan. Tapi oang Kadayan jangan dicabar pasal mahunja pasangan. Ada oang Kadayan yang pandai MUGAI. Aku nie tadangaa caita jua nganya, sama ada banaa atu inda, inda taku tahu, tapi PUGAI dikalangan masyarakat Kadayan mimang ujud. Sakuat-kuat PUGAI, caita oang patuhaan mulanya ialah bila bisia dapat MUGAI batu pangilingan lada bananang atas aing. Sandi tu PUGAI Kadayan. Bilakan dikia-kia, batu pangilingan lada atu baat, apa jua olahnya bananang kian. Amun batu pangilingan lada dapat bananang atas aing, apa lagi jalama. Sandi, sandi. Ani kan caita jua nganya. Aku inda ku balajaa ilmu PUGAI.

Babalik ka caita bausah antaie. Biaksanya bausah dibuat aie sambat, sabab kan nyampat akan makan tangah aie. Masak nasi, masak kari daging atau hayam, masak kan digulai biaksnya HUMBUT BANGKALA , HANIBUNG atau piasau (paling sanang). Yang sabanaanya HUMBUT BANGKALA, HANIBUNG atau piasau ani saingat-ingatku bilang kali makan-makan misti ada. Asanya pun baik, labih-labih lagi amun ada SAPAKnya. Aku sampai kaang ani, bila ada PASAR TANI mahunjaa taku humbut piasau. Lapas atu dimasak aing nganya diSAPAKI lauk masin dikit. EEH baik hantap asanya.

Ahie tahun lima puluhan dian awal tahun anam puluhan mulanya, bila caita pasal bausah ani dikampung kami, di kampung Kadayan lain inda ku baapa tahu, banyak caita-caita yang inda baik. Oang patuhaan Kadayan anie, tabiat nya ingin MANCUBA, maksudnya bukan mancuba kasut atau mancuba baju tapi mancuba ILMU. Bila kan malihat ILMU KADAYAN, aie makan-makan taya banyak kaluaa. Yang aku ingat hantap sampai kaang anie ada ampat, inda ku pandai lupa sabab diee talihat sandiee.

ILMU #1 – Ani salajoo di cuba aie baausah. Nasi dian kari daging inda pandai masak. Apa gaya pun dibuat, kacuali manggunakan ILMU KADAYAN jua, tatap inda masak. Aku maasaie ku talihat daging malompat kaluaa daie kawah, kakal tia badaah walaupun sudah bajaam di dalam kawah. Nasi dalam kawah, sampai hangit sudah baunya sabab angus dibawah, tapi di atas kakal baas.

ILMU #2 – Biaksanya oang tuha-tuha aie makan-makan mulanya inda ya bausah. Bisia ani duduk nganya ya, bacaita pasal ILMU. Misai oang tuha-tuha Kadayan mulanya, biaksanya lantik, ada yang diluut dian GATAH TIMBAAN. Misai lantik atu sabanaa manjadi tanda (trademark) oang Kadayan, yang ia atu baani dan barILMU dan PAMANTAK. Sandi banaa.

Ilmu ani, mimang hibat, apabila oang tuha-tuha BATUPA ilmu, kanak-kanak inda dapat hampie, takut takana, mangkali ada yang kamboh, malihat daie jauh nganya. Umah oang Kadayan biaksanya banyak pohon pisang. Ilmu ani pasal tungkul pisang. Ada tia oang tuha-tuha yang ingan BATUPA ilmu. “Liau, cuba tah kau gunting tungkul pisang atu, aku kan malihat, guguu kah inda guguu” Bila taluus yang kana suuh atu inda bailmu, mbaie sopan jamu. Bila taluus yang bailmu jawapnya sanang nganya “Aku ani inda baapa pandai, tapi kulihat tangkai tungkul atu inda baapa kaas. Bila ya inda kaas dapat diputus akan atu” Kan dibuntak akan caita, banaa-banaa, apabila oang tuha atu angkat tangan nya dan manggunting daie jauh, malabok bunyi tungkul pisang. “Tuh guguu jua atu, jangku bila yang inda kaas atu putus itu ya”

ILMU #3 – API…….oang Kadayan pasal main api mimang hibat. Biaksanya oang tuha-tuha bamain api aie malam, sabab kalihatan. Kampung Kadayan aah kami mulanya banyak pohon duyan. Biaksanya oang tuha-tuha main API ditaabang akan atas puncak duyan, Kalihatan daie jauh api bataabangan atas puncak duyan. Tapi API ani jangan dibuat pamainan….ada yang mati amun inda baapa pandai. Yang sbanaanya oang Kadayan mulanya, pasal mati anie inda ya baapa takut.

ILMU #4 – SINAPANG INDA MALATUP – Biaksanya bila ada oang kawin di kampung Kadayan, kadatangan pangantin laki-laki di sambut dian timbakan sinapang dua tiga das. Amun banyak piluu sampai tujuh kali timbak. Musim anie tah ada tia oang tuha-tuha yang ingin mancuba ilmu bisia. Katik saja sinapang, inda malatup. Kaluaa akan piluu, piluu basah, baaing. Masuk akan piluu bahaau, katik inda jua malatup, di kaluaa akan sama jua baaing. Masa atu bila ada yang pandai daie subalah pangantin bini-bini mahaga tia aah si panimbak atu dan batanya “Ngapa ya sinapang mu wang, inda ya malatup kah”. Si panimbak pun jawab “Inda ku tahu gayanya jamu tangah, piluu ani bahaau ku bali kalamaie, inda patut binasa, inda ya mau malatup. Basah, baaing cuba pulang kau lihat”. Tagal nganya oang tuha atu malihat, disuuhnya tia si panimbak atu nimbak sakali lagi. MALATUM bunyinya….”tuh malatup jua atu wang” uja oang tuha atu. Ilmu oang Kadayan ani sandi.

Bahagian 2


Ani kan nyambung lagi, caita ani banyak malaat. Yang sabanaanya aku kan nulis pasal makan-makan doa salamat oang kan naik haji, tapi jauh tia malaat ka tampat lain. Oang patuhaan mulanya bilakan naik haji ani macam inda kan mulih ka kampung lagi. Pasal oang naik haji ani banyak caita. Tapi kan ku caita akan dikit-dikit nganya. Pasal atu taya makan-makan doa salamat atu panting. Minta aah Allah SWT supaya oang yang naik haji atu salamat baangkat dian salamat mulih. “MULIH” ani jangan silap tapsir, dalam dialek Kadayan mulih ani ada dua makna, mulih yang pertama haatinya babalik ka umah atau ka kampung. “Mulih” yang kadua atu mulih yang banaa atau maninggal dunia. Ada jua paambahan (perumpamaan) dalam dialek Kadayan pasal ILMU PAMULIHAN. Ilmu pamulihan atu haatinya Ilmu Akhirat.

Oang tuha-tuha mulanya, aie makan-makan sambil-sambil bacaita pasal ILMU KADAYAN, bisia bacaita jua pasal ILMU PAMULIHAN. Tapi jaman atu kakal diee damit, yang bisia tutuan akan inda kita mahaati. Pandangaan diee hantap dalam bunyinya. Aku sampai kaangani bila mulih ka kampung, oang tuha-tuha bacaita pasal ilmu pamulihan, inda ku baapa mahaati. Tahu-tahu saja tah diee ani bukannya hantap dalam ilmu pangatahuan, balajaa pun dikit-dikit nganya.

Naik haji mulanya dalam tahun 50an dan awal tahun 60an bukan ya tagal-tagal macam kaang ani. Mulanya inda dangan naik kapal taabang, tapi naik kapal laut. Pajalanan daie Sabah ka Pelabuhan Jeddah mangambil masa 3 – 4 bulan. Masa untuk mulih mula inda kuang daie 6 bulan. Macam atu punya batah. Pasal atu oang tuha-tuha mulanya bila ya naik haji banyak macam tia pasanannya, sabab bisia tahu mungkin mulih mungkin inda.

Yang sabanaanya budaya oang Kadayan mulanya payahkan dimahaati. Bila bacaita pasal soal kawin, mati, naik haji, tahlil dan doa salamat hantap Islamnya. Tapi disabalik atu ada lagi jua yang ngamal akan ilmu-ilmu kabatinan yang boleh dikata akan ILMU HITAM. Kala-kala oang yang sama atu taya yang bila bacaita pasal ILMU PAMULIHAN yang hantap tahu bunyinya. Apa kian gayanya macam atu, cuba tolong dikit-dikit, bila ada oang yang tahu-tahu pasal caita ani.

Biaksanya oang Kadayan mulanya bila ya kan makan-makan doa salamat tolak bala kah, bisia buat aie siang untuk kasanangan oang kampung datang, bila malam payah mulih BALUUM atau BAPATANG, satu hal jua atu kan mbawa CUCUL, lampong picit atau lampong kabaid. Pasal atu taya makan-makan ani salalunya kana buat aie siang.

Bila makan-makan basaa macam makan-makan tahun, oang kan naik haji atau oang kawin, misti mbuat TAATAK, sabab umah inda tabuat. Bila kan dikia basaa damit, inda tamasuk ucing, kia-kia baatus jua dangan datang. Bila samuha kan ka umah, tatap inda tabuat. Amun umah yang JANJIT, ada yang MAAOYUT galagaa atau panyucuk umah, silap-silap untuh.

Oang mulanya bila ya manggil makan-makan inda ya bapadah jaamnya, biaksanya “tangah haie” nganya uja bisia. Lagi pun oang mulanya, inda bilang buah umah ada jaam. Aku aie damit mulanya, malihat jaam pun inda pandai, di umah pun kami inda bajaam. Sudah sikolah bahaau tah tahu malihat jaam atu pun kala-kala salah jua. Tapi TAKUIN kan bilang buah umah ada. Ada yang inda tahu haati TAKUIN? Uja oang kaang ani “kalendar atau haie bulan”. Macam mana ia di lagau TAKUIN atu inda ku tahu. Mungkin pakar Dialek Kadayan saparti Tuan Haji Ramlee Dua, Amde Sidik atau Sdra Mahmud Osman dapat mbaie panjalasan. Ada kamungkinan TAKUIN atu datangnya daie bahasa Arab ia itu Taqwim. Oleh sabab oang Kadayan ani lidahnya KAAU dikit, payah kan nyabut Taqwim atu jadi tia TAKUIN. Inda jua ku baapa tahu. Tunggu komen pambaca nanti.

Pasal lidah KAAU ani pun banyak caita. Aie diee damit mulanya kan nyabut “R” atau “RA” hantap payahnya. Aie diee balajaa ngaji mulanya, kan nyabut “RA” tu…eeh kan dicaita akan pun malas. Payah hantap. Pitua aie mullah bapa mulanya aie nya ngajaa ngaji, sanang nganya. Bila ada yang ingat lagi kan “pohon PAINGAT-PAINGAT”. Paingat-paingat nie inda ya basaa pohonnya, paling basaa pun macam kalingking. Amun di PULAK dahannya bagatah dikit-dikit. Bila yang biaksa MAHAT macam aku mulanya, dipahatan banyak pohon paingat-paingat. Jadi babalik ka caita lidah KAAU, balah dua pohon paingat-paingat atu, di AAUT nipis-nipis dijadi akan pangikis lidah. Bilang haie sambat, baca salawat 3 kali, lapas atu kikis tia lidah dian pangikis paingat-paingat yang sudah sudah diaaut atu. Insya Allah, mangasi, lambut jadinya lidah.

Yang sabanaanya paingat-paingat ani salain daie kan pangikis lidah, ia jua di buat akan PANUNJUK aie balajaa ngaji. Uja oang patuhaan mulanya, bila paingat-paingat ani dibuat akan panunjuk, mbaie capat ingat bila ngaji. Pasal atu tah aie diee damit mulanya, paingat-paingat dibuat akan panunjuk mbaca ALIP-ALIP. Bila ada kanak-kanak bahaau yang inda tahu kan ALIP-ALIP, ALIP-ALIP atu maksudnya MUQADAM uja dangan kaangani.

Bacaita pasal jaam, amun di kampung mulanya, banyak tia yang baloyar buruk. Bila ada yang bajaam tangan, jangan tah kau tanya, “pukul baapa?” Jawapannya sanang nganya “baapa kali kau guna?" (maksudnya : baapa kali tumbok kau guna?) atau "taap dian tibadak balum tuha, balum ada pukulnya!”. Hantap banaa oang Kadayan ani kan baluusnya. Caita pasal BALUUS ani, oang Kadayan biaksanya ada yang hantap BAALUUS. Di kampung mulanya ada saoang yang hantap BALUUS. Bila tajumpa ia, biaksanya ditagoo akan,“kamana kau tangah? Sanang nganya jawapnya tu “kahadapan”. Eeh... hantap sandi baluusnya banaa jalama tu.

Bahagian 3


Nota : Penulis blog ini tidak sekali-kali bertujuan untuk membangga diri, bermegah-megah, sombong, riak atau takabur di atas keturunan dan salasilah keluarganya. Tulisan ini hanyalah untuk bacaan umum supaya cerita-cerita suku kaum kita iaitu KADAYAN / KEDAYAN seperti ini dapat didokumenkan dan tidak hilang ditelan zaman. Maaf juga yang dipohon sekiranya ada diantara isi kandungan tulisan ini yang menyinggung perasaan para pembaca. Selamat membaca dan terima kasih atas sokongan saudara dan saudari sekalian. Wallahu'alam.

Oang tuha-tuha Kadayan mulanya amun kan bajalan jauh-jauh atau pun kan mbuat kaaja yang basaa-basaa macam kan naik haji, masuk saujaa, sikolah tampat lain, aie kan NUBA, babuu, nugal, ngatam, batanam tanam-tanaman, bamacam-macam tia lagi yang ninggal akan umah / kampung batah-batah atau mbuat kaaja-kaaja panting, aiee batolak / kan mulaie atu DILIHAT dahulu. Inda dapat batolak macam-macam atu nganya. Yang mustahak aiee bulan dian pukul baapa (sambat, tangah haie atau malamaie) kan batolak daie umah. Dalam kahidupan sa haie-haie pun mulanya, aimulah mama salajoo bapadah, "JANGAN BAMAIN AIE MALAMAIE". Ada sababnya ngapa oang tuha-tuha inda nyuuh bamain aie malamaie, partama jaam atu masa sambahyang mugaib, kedua mengikut kajian jaam matahaie tinggalam (senja) panglihatan kita menuun. Pasal atu ada oang tuha-tuha mulanya yang ABUN HAYAM. Oang yang ABUN HAYAM ani kia istimiwa jua sabab ia inda talihat aie malamaie nganya, macam hayam. Pasal atu ia kana galaa ABUN HAYAM. Jadi bila bamain aie malamaie, bila palihatan inda baapa baik, mangkali akan mangundang kacilakaan.

Macam kita kaangani amun kan ka Jakarta kah, ka Bangkok kah atau Manila kah, inda ya BALIHAT hantap aie diee batolak. Yang dilihat cuma tikit kapal taabang. Amun sudah abis BAPANYAP, naik kuita taaus ka airport, NUHUN taya. Hantap LAGAANnya, adakan dibubutnya pakah.

Tapi oang mulanya inda ya macam atu. DILIHAT aie yang baik bahaau tah batolak. Aie ku kakal takanang anie kan maista tah jua, aie kakak (abang) kan batolak masuk saujaa mulanya, hantap banyak pantang laangnya. Bila ku inda silap dalam hujung tahun 60an lapas konfrontasi mulanya ia masuk saujaa. Yang nuun akan mulanya, amun ku inda kusilap jua, aia mullah nini (maninggal di Kg Sungai Lada, Labuan).

Aie mullah nini anie amun ku ista namanya tatap amai yang tahu, tarutamya Kadayan yang tuha-tuha. Tapi inda payah, bukan aie anie, kamudian taya. Ia anie ada banyak aah yang dihaganya, paanak-paanaknya pun banyak di Miri (Mahiee), Limbang, Boonai, Labuhan dan anak cucunya di Masapol, tamasuk diee ani. Ia maninggal aie umoonya 115 tahun dalam tahun 70an dan bakubuu di Labuhan. Sapupuku di Sungai Lada yang njaga ia, sampai ia maninggal mulanya. Kajadian anih yang barlaku sabalum nini maninggal dunia di Labuhan ialah GIGINYA BATUMBUH SAMULA. Pada umoo saatus labih, ia inda ya lagi bagigi, UMPANG abis uja dangan, tapi kuasa Allah SWT mangatasi sagala-galanya maka pada umoo yang macam atu giginya batumbuh samula.

Aimullah nini anie inda ya TAANAH di kampung, bajalan tah nganya buatnya, ka Mahiee, Limbang, Boonai dian Labuhan. Inda dapat dilaang. Ia saong nganya yang luus, inda ya ndangaa tutuan anak cucunya.

Aie diee damit mulanya dalam tahun 50an dan 60an salajoo jua ya mulih ka Masapol malawat-lawat kami, tapi inda batah-batah. Aie ku damit mulanya hantap ingin ku amun aimullah nini mulih ka kampung, sabab kan BAPANGKU aahnya. Aie mullah nini nie hantap sandinya, kumisnya lantik, janggutnya panjang, bila bahaau talihat mbaie takut. Aie ku damit mulanya salajoo ku nahani janggut dian misainya yang lantik atu, tapi inda ya maah. Sabuting nganya pantangnya aie mullah nini ani, bila ada kanak-kanak damit jangan tia disuuh tahani. Tatap DAMAM amun ditahaninya, macam oang KATAGUAN. Kakalku takanang mulanya, dalam tahun 60an bacicit sudah ya musim atu, amun kan dikia tuha sudah jua atu, anak kakakku ditahani oleh aie mullah nini, inda batah taus damam. Lapas atu dibaienya aing, suuhnya tapus akan, inda batah baik taya.

Mangikut caita, aimullah nini ada WASAI di Boonai yang dinamaie atas namanya sandiee, aahnya BATAAK mulanya. Tapi inda ada kami pacucuannya tahu aahnya dan dapat mbuka, sabab inda balajaa, tapi ada kamungkinan sapupuku di Labuhan ada munggut dikit-dikit daie aie mullah nini, mangkali ia dapat mbuka. Ada kamungkinan jua paanak-paanaknya di Limbang, Mahiee atau Boonai ada yang manuntut daie aie mullah nini, yang atu inda tah diee tahu, sabab paadian-paadian di Limbang, Mahiee dian Boonai pun inda maasaie bajumpa, kacuali ada dua tiga oang daie Mahiee yang bajumpa dian sapupuku di Labuhan. Tapi bila dapat dibuka pun WASAI aie mullah nini atu inda banyak paedahnya, manyusah akan nganya, labih labih lagi macam diee yang inda pandai anie.

Bila ku inda silap aie mullah nini atu adalah Kadayan terakhir dalam generasinya yang mamiliki ciri-ciri KADAYAN ZAMAN SILAM, khususnya daie sagi upa, parwatakan dan ilmu kabatinan. Aku batutuan macam ani, sabab umoonya 115 tahun aienya maninggal DAN samuha kawan-kawan sabayanya yang kami tahu, tarutamanya di Labuhan dian Masapol inda ada lagi, kabanyakannya maninggal 40 tahun atau 50 tahun sudah bisia masa aie mullah nini kakal hidup. Bila ditanya akan aah oang tuha-tuha di kampung pun macam atu caitanya.

Mungkin nanti ada pambaca yang ingin batanya apa haatinya KADAYAN ZAMAN SILAM? Insya Allah, topik ani akan ku ulas ditulisan-tulisan akan datang, tapi buat masa ani cukup tah bila ku padah akan yang KADAYAN ZAMAN SILAM ani mampunyai sifat-sifat yang hantap MBAIE TAKUT. Ani kan caita jua nganya, dan inda sakali-kali diee ani barbangga, takabur dan maninggi diee tarhadap datuk nini diee mulanya. Lagi pun tujuan ku mbuat blog ani ialah untuk nulis kisah-kisah Kadayan zaman silam untuk bacaan paanak-paanak kaang ani supaya caita ani inda hilang macam atu nganya. Taluus tia jua oang yang dapat dibuat akan contah atu ialah nini ku sandiee yang sampat diee jumpaie aie diee sudah baakal mulanya.

Caita aie mullah nini ani banyak, tapi satakat ani tah dahulu, Insya Allah ku sambung lagi kamudian. Ani pun hantap jauh malaatnya sudah. Jadi bacaita pasal BATOLAK ani, bila kakak kan batolak daie umah mulanya, dua kali tangguh, aie yang katiga bahaau taya dapat batolak. Bila ku inda silap aie partama, ada ucing malintas. Inda jadi. Aie yang kadua buung gagak babunyi, inda jua jadi. Aie yang katiga bahaau taya aie mullah nini lapas akan. Pitua-pitua oang tuha-tuha mulanya ani payah kan dipahami bila inda dipalajaie. Bisia nganya yang tahu. Jaman sudah balalu, kaangani inda lagi banyak pitua-pitua macam ani yang diamal akan. Mangkali ani tah pakah yang dimaksud akan “RELATIONSHIP WITH NATURE” atau “PERHUBUNGAN DENGAN ALAM SEMULAJADI”

Dengan izin Allah SWT dimasa-masa akan datang bila dipanjang akan umoo, saya akan kongsi barsama barkaitan pamilihan aie dan masa-masa yang sasuai untuk malaksanakan sasuatu tugasan saparti batolak, mbuat kaaja-kaaja panting atau baubat. Mangikut kajian oang tuha dalam sahaie (24 jam) ani ada tardapat waktu atau saat yang BAIK dan yang INDA BAIK atau dikanali juga sabagai “NAAS”. Saat “naas” ani tah yang inda baik untuk malaksanakan sasuatu tugasan. Ani bukan ujaku tapi uja oang tuha-tuha mulanya.

Bahagian 4

Naik haji ani uja oang mulanya bukannya kasana macam atu nganya. Mau banyak basadia. Basadia atu maksudnya mangatahui SYARIAT dan MAKRIFAT haji atu sandiee. Bila kasana inda cukup palajaan inda ya baguna, ngabis akan usin nganya uja oang tuha-tuha mulanya. Tapi saingat-ingat ku oang kan naik haji mulanya inda ya bakursus macam kaang ani. Kaang ani hantap sanang kan naik haji, kursus haji dimana-mana ada, yang parcuma kah, yang babaai kah samuha ada, pilih saja mana yang kita tapakai. Tapi mulanya inda ya macam atu, saingat-ingat ku oang kan naik haji mulanya balajaa daie dangan yang sudah naik haji dan kitab-kitab PARUKUNAN. Mangkali aku salah, tapi yang ku ingat macam atu tah, bila ku salah tolong luus akan.

Tapi di kampung mulanya, ada jua oang tuha-tuha yang sudah naik haji dan dikia bapangalaman. Jadi bisia ani tah jadi rujukan dan tampat batanya-tanya. Bila ndangaa caita oang yang sudah naik haji banyak tia yang mbaie takut aie diee damit mulnya. Aku yang hantap ku takut amun oang tuha-tuha bacaita pasal sasat di Makah. Kan bilang oang yang naik haji mulanya bacaita pasal sasat di Makah. Uja dangan amun sasat di Makah ani ada sababnya, macam-macam tia caita dangan, tapi bagi pandapat aku lah, oang yang sasat atu sabab amai dangan, inda ya tahu aah kan nuju, sama tia nganya palihatannya. Lagi pun bisia atu kabanyakannya oang tuha-tuha, mata pun abun dikit-dikit, inda bacaamin mata. Tahu-tahu tah saja bahaau tah maasaie tajumpa oang amai, dikampung inda baapa amai, bilang haie kita bajalan, tahu sudah diee mana kan dituju, tapi di Makah jalama amai palihatan bisia sama tia nganya, jadi inda tah tahu kan dituju. Picaya banaa ku, oang amai macam atu, amun inda biaksa tatap sasat.


Takanang diee lagi mulanya, oang yang kan naik haji atu banyak yang kan di palajaie, satu daipadanya balajaa NGIKAT SAAL. Ada yang inda tahu SAAL tu apa? SAAL tu dalam Bahasa Malayunya SARBAN. Uja oang Kadayan SAAL. Ngikat saal ani yang sabanaanya bukan mudah, amun inda maasaie balajaa. Mudah tapacul, bila inda tahu malilit. SAAL ani simbol yang panting bagi oang yang sudah naik haji di kalangan oang Kadayan di kampung kami mulanya. Ia macam satu kamastian. Bila yang sudah naik haji atu misti makai SAAL. Takanang jua diee lagi, amun sambahyang aie aya aidil fitri atau aie aya haji, kala-kala sambahyang Jumaat pun ada, musim atu tah bila kan malihat oang tuha-tuha yang sudah naik haji, makai SAAL langkap bajubah, batali pinggang haji, makai minyak ATAR lagi tu, ada jua dua tiga oang yang mbali pakaian arab di Makah aienya naik haji mulanya makai pakaian Arab, langkap dian “head gear” yang ampat pasagi atau bulat di tauh aah SAAL yang inda balilit. Arab “head gear” yang babantuk ampat pasagi atau bulat atu inda ku takanag namanya, bila ada pambaca yang tahu namanya tolong baie tahu. Macam oang Arab upa bisia. Musim atu diee kakal damit, inda bakamera kan nangkap gambaa bisia. Bila ada gambaa hantap bangisnya kan di kanang-kanang uja dangan.

Ani kan babalik pasal caita ngikat SAAL, yang sabanaanya SAAL ani ada dua jinis yang aku tahu. Saal yang partama, kain alus, barwarna putih inda babunga-bunga, babantuk ampat pasagi. Saal yang nomboo dua, kain alus jua babantuk ampat pasagi tapi bawarna hitam atau miah-miah dikit dalam bantuk pitak-pitak damit, sieng SAAl atu ada bainda-inda di sakalilingnya. Cara ngikat kadua-dua SAAL atu pun balainan. Biaksanya SAAL yang putih atu diikat aah kupiah haji. Ikatannya pun adun. SAAL yang babunga-bunga atu yang diee talihat mulanya inda baapa adun ikatannya. Basaa upanya di kapala oang tuha-tuha yang makai SAAL atu.
 

Oang yang kan naik haji ani, aie kan batolak daie umah ada yang nuun akan. Takanang ku lagi aie diee damit-damit mulanya, ada dangan BABAANG lapas atu BASALAWAT. Sudah bisia kan batolak ada yang basadakah dahulu aah oang amai, tarutamanya kanak-kanak. Tapi bisia mbaie sadakah inda ya sawang-sawang gayanya, usin pacah atu dihamboo tia nganya macam atu. Apa lagi yang diee kanak-kanak ani iski hantap tah diee, baabut-abut ngambil usin, amun taluus aie hujan, banyak yang tadasoo, inda olah nih tanah likin. Abis kamah saluaa dian baju. Lapas atu bahaau tah bisia batolak. Biasanya amai dangan ngantat aie oang kan naik haji batolak. Tahun 50an atu oang batolak kan naik haji daie umah, bajalan batis nganya inda ada “UNGKAH” uja dangan. Jalan basaa pun balum ada, yang ada pajalanan batis nganya yang kala-kala licak amun musim hujan. Mulanya aie dangan batolak daie kampung kami, bila ku inda silap, ka Labuhan bisia dahulu. Daie Sipitang bisia naik paahu ka Labuhan, daie Labuhan atu inda tah ku tahu, sama ada batolak taus daie Labuhan atau ka Api-Api ya dahulu bahaau tah bisia batolak ke Jeddah. Bila ada yang tahu caita ani tolong padah-padah akan. Uja ku oang kan naik haji ani batolak ka Labuhan ya dahulu sabab atu tah jalan yang paling sanang sabab daie Sipitang dalam tahun 50an mulanya inda ada jalan ka Bopot (Beaufort, uja oang Kadayan BOPOT). Yang ada mungkin jalan kuita api daie Weston ka Bopot nganya, lapas atu bahaau tah ka Api-Api. Ada kamungkinan jua oang mulanya yang kan naik haji atu ka Weston ya dahulu, lapas atu taus ka Api-Api inda ya ka Labuhan tujunya. Yang tahu-tahu atu tolong baie tahu lai. 

Dalam tahun 50an atu, di kampung kami balum ada UNGKAH. Inda olah BAUNGKAH amun jalan pun inda ada. Ungkah ani saingat-ingat ku dalam tahun 60an bahaau tah maasaie talihat apa upanya ungkah atu. Yang sabanaanya “UNGKAH” ani daie bahasa oang Baitis macam “INGGIN” jua. Amun INGGIN atu datangnya daie tutuan oang Baitis “engine”, jadi lidah oang Kadayan ani KAAU dikit jadi tia INGGIN. Asal usul tutuan UNGKAH ani macam ani caitanya. Caita ani yang sabanaanya datang daie Labuhan bukan daie Masapol atau kampung-kampung Kadayan lain di Sipitang. Jaman Baitis mulanya di Labuhan, ada tah oang Kadayan yang jadi dareba Tuan Residen atau Tuan DO. Nama oang Kadayan yang jadi dareba atu inda tah kita nie tahu. Kita nama akan tia Si Lamat (macam dalam lagu Sdr Ibrahim Hj Diman). Macam ani gaya tutuan nya:

Si Lamat : “Apa gaya tuan Residen / DO mulih ka umah aie ani?’
Tuan Residen / DO : “Aku mulih naik my OWN CAR”.

Jadi luan hantap salajoo Si Lamat ndangaa tutuan Tuan Residen / DO ngucap “OWN CAR”, jadi daie sana tia malaat tutuan “OWN CAR” jadi “UNGKAH”. Ia jadi UNGKAH atu pun pasal lidah oang Kadayan ani KAAU, inda ya dapat nyabut OWN CAR, hantap oang Baitis bunyinya, lagi pun huup “R” dalam CAR atu hantap payah kan di tutuan akan. Macam caitaku bianie pasal ngaji kan nyabut "RA” atu hantap payahnya. Jadi yang paling sanang ditutuan akan ialah UNGKAH. Sampai tia kaang ani oang Kadayan makai tutuan UNGKAH atu. Tapi ada jua oang Kadayan yang yang nyabut KUITA, yang datangnya daie sabutan oang Malayu. Antah banaa antah inda, kan caita jua nganya. Bila ada caita lain pasal asal usul tutuan UNGKAH atu padah-padah akan tia aahku atu tulis dalam komen yang disadia akan atu.

Nunggu oang kampung mulih daie naik haji ani hantap batahnya. Paling-paling awal pun dalam 8 – 9 bulan, ada oang mulanya yang sampai batahun-tahun bahaau tia mulih, sabab manuntut di Makah. Nyambut oang mulih daie Makah ani labih daie kan ngantat bisia batolak ka Makah. Amun tadangaa habaa yang naik haji atu kan mulih taya, amai oang kampung nunggu. Macam biaksa lah amun sudah bajumpa dian oang yang bahaau mulih daie naik haji, batakul-takulan tia bisia kan ngambil BAAKAT uja dangan. Mudah-mudahan yang balum naik haji atu dapat “LAMBAI” kan naik haji. Tutuan “LAMBAI” ani pun inda ku baapa tahu ngapa oang tuha-tuha mulanya ngucap LAMBAI bila kan naik haji. Kala-kala ada yang cukup usinnya sudah, tapi balum ya naik haji, ujanya balum dapat LAMBAI. Haati tutuan lambai atu tahu diee, tapi ngapa ya di pakai untuk naik haji. Bila ada yang tahu-tahu atu tolong ku lagi lai, ngapa ya kana ucap LAMBAI?

Ada jua ku taima komen daie pambaca dalam tulisan ku yang sabalum ani. Komen pambaca yang manggunakan nama BANGKUTUT atu macam ani bunyi nya: -

Ceita pasal naik haji ani, banyak hantap pantang larangnya, yang kuingat;

i. Bersedakah jangan PISANG karang tergelincir di Makkah.
ii. rajin-rajin bersedakah Galagah (tebu) inda karing lihir di sana.

Mbaie hijap banaa oang Kadayan ani.

Oang mulih naik haji ani banyak caita bisia, tapi aie diee damit mulanya ada jua oang tuha-tuha bacaita yang ada caita di Makkah atu yang inda dapat dicaita akan. Bila dicaita akan jua, jalama atu jadi “LULUI” sabab kana “KISAS”. Inda jua ku baapa tahu, bila ada yang tahu-tahu atu tolong jalas akan caita ani. Caita ani inda dapat ku panjang-panjang akan sabab di kampung kami mulanya ada kes yang macam ani. Tapi ani samuhanya kuasa Allah Taala, sama ada ia jadi LULUI atu disabab akan bacaita kisah-kisah sulit yang dialaminya di Makah atau di sabab akan parkara-parkara lain yang inda kita tahu. Wallahu 'alam bisawab.

Kisah-kisah yang ku caita akan di dalam tulisan ani kan caita jua nganya uja dangan. Bila yang baik atu di jadi akan tauladan, bila yang inda baik atu di jadi akan sampadan . Yang panting hantap dalam soal naik haji anie ialah kita samuha mandapat HAJI MABRUR daie Allah SWT. Bila yang sudah naik haji atu, tantu tahu apa paasaan masing-masing samasa di tanah suci Makkah. Marilah kita sama-sama berdoa ke hadrat Allah SWT semoga ahli keluarga kita, sudara mara kita dan para muslimin dan muslimat yang menunaikan fardhu haji tahun ini Selamat Kembali ke tanah air dan semoga dianugerahkan dengan haji yang mabrur oleh Allah SWT. Amin.